Aukin pólaríseríng, upplýsingaóreiða, falsfréttir, upplýsingaofgnótt og fréttaforðun er á meðal þeirra áskorana sem samfélagið stendur frammi fyrir. Hvernig hefur hlutverk blaðamanna breyst í þessu nýja umhverfi?

„Það er ekki einfalt að undirstrika mikilvægi blaðamennsku í fáum orðum,“ segir Sigrún Ósk Kristjánsdóttir, blaðamaður á Stöð 2. Aðrir viðmælendur taka í sama streng og undirstrika mikilvægi blaðamennsku þegar kemur að því að veita stjórnvöldum og atvinnulífi aðhald en einnig hvað varðar heimilda- og söguskráningu fyrir samfélagið.

Blaðamennska er ekki síður mikilvæg til að veita almenningi nauðsynlegar upplýsingar, sem er forsenda lýðræðis.

Blaðamennirnir Sigríður Hagalín, Fanndís Birna Logadóttir, Helgi Seljan, Þorsteinn Ásgrímsson og Sigrún Ósk Kristjánsdóttir draga upp mynd af samfélagi án blaðamennsku. „Samfélag án blaðamennsku, það er bara alræði, einræðisríki eða harðstjórn, það er ekki til neitt annað yfir það,“ segir blaðamaðurinn Sigríður Hagalín og Helgi Seljan tekur undir.

„Við getum ímyndað okkur hvort fólk vilji almennt búa í Eritreu eða Norður-Kóreu því þar erum við í raun með heim án blaðamennsku.“

Enginn dagur er eins, eru blaðamennirnir sammála um. Þeir standa vaktina alla daga, allt árið um kring: „Ég svaf í fötunum í þrjár vikur tilbúinn ef það færi að gjósa,“ segir fréttaljósmyndarinn Árni Sæberg. Blaðamenn eru fulltrúar almennings, hvort sem er gagnvart stjórnvöldum eða á vettvangi stórviðburða, þar sem þeir lýsa aðstæðum, upplýsa almenning og setja í samhengi.